Save Mon State
  Home. Contact. Activities. People & History. Statement. CC Members. About Us. Links.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

ဘဲဒဏ်ဍာ်​ဇၞော်  သဘာဝလီုလာ် 

 

လောန်ကၠုၚ်သတ္တဟ အဒိုတ်တုဲဏံဝွံ အလုံဒေသရးမန်ကီု  ကေုာံ ဒေသကရေၚ်လ္ၚဵု ဒေသကချေၚ်လ္ၚဵု တံကီု  ဗြဲဇၞော်ဂူ သီုကဵုလပိုတ်ကျာက္တဵု ဒှ်အိုတ်ရ၊  သ္ပဟိုတ်နူဗြဲဂူဇၞော်ကဵုဇြဟတ်တုဲ ပ္ဍဲတ္ၚဲသိုက်လောန်ကၠုၚ်တေံ  တွဵုရးဍုၚ်မန် ပွိုၚ်ဍုၚ်ပံၚ် ပ္ဍဲကွာန်သဖျူကုန်ဂှ် ၊ ဒဵုသရိုဟ်လိုက်စှ်ေကၠုၚ်တုဲ ညးဒေသတံအာစိုပ်ဒဒိုက်ဘဲ ဇၞော်ကဵုဇြဟတ်ရ၊ 

ပ္ဍဲကဵုဒေသဒဵုသရိုဟ် ပွိုၚ်ဍုၚ်ပံၚ်ဝွံ  လၟိဟ်သ္ၚိ (၃၀)မ ဒးဒုၚ်သရိုဟ်လီုလာ်အာတုဲ မၞိဟ်(၁၂) တၠ ကၠေံမံၚ်အကြာပွဳပွိုၚ်ဒေသ ဒဵုသရိုဟ်လဝ်ဂှ်ရောၚ်၊  လၟိဟ်မၞိဟ် (၅၂) တၠ အာစိုပ်ဘဲဂစိုတ်နွံက်ုရောၚ်  ဂအုပ်ဗဵုဇၞော် တွဵုရးမန် ဇြဝ်မေန်ထောန် သ္ဂးလဝ် ပ္ဍဲတ္ၚဲစန်တေံရ၊။

ဘဲကပ်ဍာ်ဇၞော်ဒဵုသရိုဟ်လီုလာ်သာ်ဏံဝွံ အပ္ဍဲကဵုပွိုၚ်(၁၀) သၞာံလောန်ကၠုၚ်တုဲမ္ဂး သၞာံဏံဂှ် ဇၞော်အိုတ်ရောၚ် ညးတာလျိုၚ်ဒေသတံဟီုဂးလဝ်အိုတ်ရ။ 

သ္ပဟိုတ်နူဘဲကပ်သဘာဝဏံတုဲ အလုံမွဲဍုၚ်ဗၟာ မၞိဟ်ဒးဒုၚ်ဆုဲပြံၚ်သ္ၚိဌာန်တံ လၟိဟ်105,000 ပြၚ်ရောၚ် နူဌာန အခေါၚ်အရာမၞိဟ် ,UN တံ လလောၚ်တြးလဝ်နွံရ။ ကုညးမၞုံကဵုသ္ၚိ ဗၠိုက်အာဍာ်တံဂှ် လၟိဟ်သ္ၚိ  25,000 ပြၚ် ဒးအာဗ္ဒဗဒါဲမံၚ်အကြာဘာလကျာ်နွံတုဲ နူကဵုဌာနပရိုၚ် Global New Light of Myanmar ပတိုန်ထ္ၜးလဝ်ရ၊၊

ဟိုတ်ဂွံက္တဵုဒှ်သာ်ဏံဂှ် ပွမၜံက်ခါဲဇိုၚ်ဇြဟ်ဒဵုဟွံမွဲကဵု သၞောတ်ဗ္ၜတ်ကီု၊ ပွမထောံကၠဟ်ခၟိက်ဟန်ဗန် အကြာ စောဝ်ကြုၚ် ကၟာတ်ထောံဂၠံၚ်ဍာ်ဇွောဝ်ကီုနွံရောၚ် ဝန်ဇၞော်တွဵုရးဍုၚ်မန် နာဲဨသာန်ဟီုရ။ 

သဘာဝဂွံက္တဵုဒှ်ဖံက်ပၠန်ဗီုဏံမာန်ဂှ် ပွမပလီုပလာ်သဘာဝ ၜံက်ခါဲဗက်ဇုက်ဂၠံၚ်တရဴမိုၚ်ကီု၊ ဗါ်ပလီုပလာ်ဂြိုပ်ဆု ဟွံမွဲကဵုသၞောတ်ဗ္ၜတ်ကီု၊ ဒှ်တမ်တုဲ သဘာဝလီုလာ်က္တဵုဒှ်ကၠုၚ်ဗီုဏံရ။ 

ပွမဗါ်ပလီုဂြိုပ်ဆုဂှ် တုပ်တဴညံၚ်ရဴဗါ်ကုတ်ထပိုတ်ကအ်မၞိဟ်တံကီုရောၚ် ဥုကျဝ်တိတ်ဝေန် ဟီုထ္ၜးလဝ်ရ။ 

အလုံမွဲတွဵုရးမန်ဂှ် ၜိုတ် %90 က္ဍိပ်ကၠံဂှ်ဒးဒုၚ်မံၚ်ဘဲကပ်ဍာ်ဇၞော်ရောၚ် လောန်ကၠုၚ်တ္ၚဲအဒိုတ်တေံ ကိုဝ်ဝေန်နိုၚ်တိတ် နူဒေသရေဝ်သ္ဂးလဝ်ရ။ 

အကာဲအရာတ္ၚဲဏံဝွံ ပ္ဍဲဒေသညးဒးလဝ်ဘဲဍာ်တံဂှ် ဍုန်တိုပ်စလ္တူသ္ၚိဟွံဂွံတုဲ စၞစသ္အးဇ္ၚးလၟေၚ်တ္ၚဲတံ နွံပၟိက်မံၚ်အရီုဗၚ်ရ။ 

လောန်ကၠုၚ်တ္ၚဲအၚာတေံ နူကဵုဂကောံ  UN တံလေဝ် ဖျေံလဝ်သ္ဂုတ်သွာတ် သွက်ဂွံကၠုၚ်ကဵုရီုဗၚ်နွံရောၚ်၊ နူကဵုဂကောံ UNCEF တံလေဝ် ပလံၚ်ဗစိုပ်လဝ်ကပေါတ် ပရေၚ်ထတ်ယုက် နာနာတံနွံကီုရောၚ်။ 

ပရိုၚ်ဏံဝွံကၠနိဿဲကၠာဲလဝ်ဘာသာနူကဵုပရိုၚ်နာနာတံရောၚ်။

ပရိုၚ်တံမူလဂမၠိုၚ်

https://www.theguardian.com/world/2019/aug/12/myanmar-scrambles-to-rescue-flood-victims-as-landslide-kills-dozens?fbclid=IwAR1fSga4B2BfLRqeMSxybCRfOZUCMjvctfaGCWlS6rG2yRtekL_DEgPRMRM

https://reliefweb.int/report/myanmar/myanmar-monsoon-floods-update-11-august-2019-corrigendum?fbclid=IwAR1XJfXtul_Hd5YjGcVETbRJJ1Ssl6l4dHRF3J1SWy9miiVAWB6D3SJPeds